Sebastian Vettel me “kokëkuqen” është shpallur kampion në Çmimin e Madh të Belgjikës në pistën e SPA. Kjo ishte fitorja e tretë për pilotin gjerman në këtë pistë, por e para me Ferrarin, pasi dy herë kishte fituar me Red Bull. Ndërsa skuderia Ferrari fitoren e fundit e kishte marrë në 2009-ën me Raikkonen. Gjithçka u vendos që në start ku Vettel parakalon mjaft bukur Lewis Hamilton dhe më pas nuk e lëshon më kreun edhe pas pit-stopit.
Ndërsa Hamilton, që dje korri “pole” dhe sot u nis nga vija e parë, u detyrua të kënaqej me vendin e dytë. Në podium u ngjit edhe Max Verstappen me Red Bull (i treti), që para fansave të tij nuk mund të bëjë më shumë se kaq.
Emocione gara kishte vetëm në start ku makinat u përfshinë në një aksident të frikshëm dhe masiv. Njëvendëshja e Alonso goditet nga pas nga Leclerc dhe makina e spanjollit fluturon mbi kokën e Hulkenberg, pamje vërtet të frikshme, por që për fat nuk ka pasoja të pilotët. Në start u dëmtua edhe makina e Kimi Raikkonen i cili pas disa xhirosh u tërhoq nga gara, po atë fat kishte edhe Daniel Ricciardo me Red Bull. Bottas bën një garë fantastike, pasi u nis i fundit dhe e mbylli garën i katërti.
Mirë u paraqit në këtë garë edhe makina Force India, që u klasifikua vendet 5-6 me Perez e Ocon, ndërkohë që në “top-10” u renditën Grosejan e Magnussen me Haas, Gasly me Toro Rosso e Ericsson me Sauber.
