Lirohet një ditë pas arrestimit efektivi i Policisë së Durrësit, i cili u ndalua si i dyshuar se ishte shkaktar i vetëvrasjes së bashkëshortes së tij, Merita Hajdari. Sherif Hajdari kërkoi një masë të lehtë shtrënguese, duke deklaruar se gjendja e tij shëndetësore nuk është e mirë dhe mbi të gjitha në mungesë të bashkëshortes duhet të kujdeset për dy djemtë e tij.
Në këto kushte, Gjykata e Durrësit vendosi si masë sigurie për efektivin “detyrim paraqitje”. Sipas gjykatës, Hajdari do të paraqitet pranë oficerit të policisë gjyqësore të hënën e parë dhe të tretë të çdo muaji.
Në seancën e zhvilluar me dyer të mbyllura, efektivi i policisë mësohet të ketë deklaruar se gjithçka ndodhi në një moment kur ai dhe bashkëshortja e tij po debatonin për gjëra të përgjithshme dhe asgjë specifike.
Ai ka pohuar se i gjithë debati, i cili degradoi me tone të ashpra i zhvillua në prezencën e familjarëve të tjerë.
“Ndoshta e prekur nga sedra, Merita u largua për pak, për t’u rikthyer me pistoletën në dorë. Sapo e pashë, bërtita ‘mos’, por ajo e vendosi në kokë dhe qëlloi veten”, mësohet të ketë deklaruar bashkëshorti i viktimës.
Ngjarja e rëndë ndodhi mesditën e së hënës rreth orës 13:20 në lagjen nr. 7 të qytetit të Durrësit në banesën e çiftit Hajdari. Ndërsa vetëm dy ditë me parë, nëna e dy fëmijëve u përcoll për në banesën e fundit. Sipas deklaratës së dhënë në Polici nga efektivi, kohët e fundit ata kishin pasur mosmarrëveshje.
“Ishim duke debatuar për gjëra të përgjithshme në familje. Ishte ora rreth 13:00 dhe po debatonim me njëri-tjetrin. Aty ishte kunata ime (nusja e vëllait) dhe familjarë të tjerë, pasi kemi një shtëpi 3-katëshe dhe jeton aty edhe vëllai im me familjen. Llaf pas llafi, ‘jo kështu po ashtu’, debati mori përmasa të tjera. ‘Kush je ti, kush jam unë’, ‘jo ti po unë’. Kështu muhabetesh, në dukje pa rëndësi, por që prodhonin debate”, ka deklaruar ndër të tjera efektivi para kolegëve të tij në Drejtorinë e Policisë së Durrësit. /PANORAMA/
