Duket se përpjekjet e mazhorancës për të marrë një votë “pro” Demarkacionit nga ana e deputetëve të Vetëvendosjes, kanë rezultuar pa sukses.
Kështu, Lëvizja Vetëvendosje nuk ka ndryshuar vendimin e tij, duke theksuar edhe një herë se do të votojë kundër ratifikimit të marrëveshjes së Demarkacionit.
Deputeti i VV-së, njëherësh sekretar organizativ i partisë, Ismajl Kurteshi tha për “Epoka e re” se Vetëvendosje është kundër izolimit të Kosovës, por nuk mund ta votojë versionin aktual të Demarkacionit. Sipas tij, përgjegjësit e këtij izolimi duhet të gjejnë rrugën për të dalë nga kjo situatë.
Mes të tjerash ai u shpreh i pakënaqur me mënyrën e qeverisjes në vend dhe, sipas tij, qeveria aktuale është duke humbur legjitimitetin dhe besimin qytetar.
