E papritur, vetëm një javë pasi u bë zyrtar emërimi i tij si trajner vjen shkarkimi. Bëhet fjalë për serbin, Sinisa Mihajlovic i cili është shkarkuar nga pankina e Sportingut të Lisbonës akoma pa e prekur atë. Ai vjen nga një eksperiencë e gjatë, pasi ka drejtuar ekipe të mëdha në Serie A si Milan, Bologna, Samdporia e Torino, por që nuk ka mjaftuar për të bindur portugezët.
Mihajlovic firmosi me ish-presidentin Bruno de Carvalho kontratë 3-vjeçare, ndërsa bordi drejtues, që kryesohet nga José de Sousa Cintra, pas largimit të presidentit, ka vendosur ta rrëzojë emërimin e serbit trajner. Ata nuk e kanë parë si njeriun e duhur për të marrë në dorë ekipin dhe për këtë arsye kanë vendosur që në orët në vazhdim të zyrtarizojnë shkarkimin.
Sipas mediave portugeze, Sportingu ka të drejtë ta anulojë kontratën, sepse Mihajlovic nuk e ka nisur ende punën dhe është në një priudhë 15-ditore në provë.
Një precedent i ngjashëm ka ndodhur në vitin 2004 me Luigi Delnerin, që firmosi me Porton, duke zëvendësuar Mourinhon, por dy muaj më pas, ende pa nisur sezoni i ri, u shkarkua për shkak të mosmarrëveshjeve me drejtuesit. Por në atë rast italiani e çoi çështjen në FIFA, duke përfituar 600 mijë euro dëmshpërblim.
