“Nuk jam dakord me sjelljen e policisë gjatë arrestimit të Arben Ndokës!”.
Në një kontakt me TIRANA TODAY deputeti i Partisë Socialiste, Pjerin Ndreu, sqaroi arsyet e pakënaqësisë së tij me mënyrën e arrestimit të mikut të tij të ngushtë, ish-deputetit Arben Ndoka.
Sipas Ndreut, “gjatë momentit të ndalimit, policia ka bërë veprime skandaloze në sy të fëmijëve e familjes së Arben Ndokës”. Po sipas deputetit Ndreu, kjo është edhe arsyeja kryesore e acarimit të tij.
Më herët, gjatë mbledhjes së grupit parlamentar të PS, deputeti Pjerin Ndreu e quajti skandaloze mënyrën e arrestimit të Ndokës.
“Nuk marr përsipër të gjykoj provat. Kam rezerva për mënyrën skandaloze të veprimit, sjelljen skandaloze se si kanë vepruar me mënyrën e arrestimit. Dhe aplikimin e dy standardeve, një grup që quhet i parëndësishëm dhe merret prokuroria lokale, dhe një grup tjetër që merret Prokuroria e Krimeve të Rënda.
Duhet shihen me qetësi këto gjera. Ne si forcë politike nuk mbështesim asnjë veprim te paligjshëm. Por mënyra e të vepruarit të prokurorisë dhe policisë në dy raste të ndryshme në Lezhë, është e habitshme. Të presim verdiktin e drejtësisë e te flasim për të tjerat”.
