Erion Veliaj ia doli për të arritur paktin me artistët, për t’i dhënë zgjidhje Teatrit Kombëtar. Këtë njoftim e dha përmes rrjeteve sociale, por si për ti dhënë vulën përfundimtare, në një lidhje telefonike për “Report TV”, kryebashkiaku i mëshoi fort faktit se Teatri Kombëtar do të jetë pa kullë.
“Bëmë një projektligj të mirë, projekt i rafinuar”, ndërsa shtoi më tej se prona nuk do të preket dhe se Teatri do të ndërtohet pa kulla sipër. Me këtë marëveshje, artistët janë bindur e këtë e vërteton edhe fotoja ku Veliaj pozon përkrah tyre.
Pas një negociate mes Veliajt dhe komunitetit të artistëve, të përfaqësuar nga regjisori Altin Basha, aktorët Alfred Trebicka dhe Arben Derhemi, u mundësua dakordësimi për të ndërtuar një godinë të re moderne të Teatrit Kombëtar, në tokën ku ndodhet sot.
https://tiranatoday.com/veliaj-korrupton-artistet-derhemi-e-nxjerr-blof/
“Dua të falenderoj sot publikisht të gjithë komunitetin e artistëve, sindikatat, qytetarët, protestuesit, arkitektët, urbanistët, zjarrfikësit, të gjithë ata që kanë dhënë një dorë, disa në mënyrë më intensive, disa sporadike, por të gjithë që kanë dhënë një dorë që të gjejmë gjuhën e përbashkët për t’i dhënë Tiranës një Teatër të ri, modern, në tokën ku është Teatri sot. Kjo nuk ka qenë një negociatë e lehtë. Në fillim fare filluam nga ekstreme, nga qëndrime shumë të ndryshme, por mesa duket ku ka vullnet, ku ka dëshirë, ka një rrugëzgjidhje. Dua t’i falenderoj publikisht jo vetëm të dyja sindikatat, të gjithë faktorët që insistuan që ky projekt të bëhej më i mirë”, tha Veliaj.
Më tej, ai u shpreh se është rënë dakord që në ligj të jepen garancitë e duhura për artistët, që Teatri Kombëtar do të jetë në sipërfaqen ku ajo ekziston edhe sot, me një godinë të vetme dhe mbi të gjitha, që do të bëhet pa shpenzime të fondeve publike.
“Projekti që kemi sot është më i mirë. Nuk është ndoshta projekti perfekt, por tashmë e kemi të sanksionuar në ligjin që do të negociojë Teatrin e ri, se prona e Teatrit nuk preket, që e negocion Teatrin e ri si një ndërtesë monovolum, pa kulla sipër, dhe që e negocion këtë Teatër të ri me çelësa në dorë, me para të privatit, që edhe kushdo shqetësohet pse po harxhojmë për artin, kur s’kemi bukë për të ngrënë, që edhe kjo s’është e vërtetë, të mos e ketë këtë shqetësim sepse nuk do të taksohet njeri për këtë propozim”.
Gjithashtu, kryebashkiaku Veliaj tha se pjesë e këtij dakordësimi është edhe përcaktimi që në grupin e punës që do të negociojë për projektin dhe ndërtimin e Teatrit të ri, të ketë edhe një përfaqësi të artistëve.
“Kemi sanksionuar në këtë ligj, në dallim nga të gjitha institucionet e tjera që përfaqësohen vetëm me një anëtar, ne do të kemi dy anëtarë që përfaqësojnë komunitetin e artistëve dhe të aktorëve. Duke i pasur të përfaqësuar besoj se ky projekt fillestar u bë më i mirë falë pranisë edhe kritikave të tyre, besoj që edhe produkti final me këto dy vende që presim të na i propozojë komuniteti artistik, që nuk janë vende spaletash as vende luksi, është një punë rigoroze e një shqyrtim dokumentacioni dhe një negociatë e fortë që do të duhet të bëjmë si me arkitektët, ashtu edhe me investitorët, që të arrijmë një produkt po aq dinjitoz sa ky produkt fillestar”.
TIRANA TODAY
