Çështja e Kampit të Tepelenës, ka qenë tema e emisionit “Studio e Hapur” këtë të martë në News24.
I ftuar ka qenë Simon Miraka, një nga të mbijetuarit e Kampit të Tepelenës i cili ka rrëfyer ditët e tmerrit që ka kaluar në ato ambjente.
Në një rrëfim prekës, Miraka tha se brenda 24 orësh në kamp kanë ndërruar jetë rreth 30 fëmijë për shkak të mungesës së ushqimeve dhe higjenës.
“Kam shku 2 javësh. Jemi internu në 1945. Fillimishit jemi sistemu në kalanë e Beratit. Në 1949 na hoqën nga Berati dhe na sistemuan në ‘Toran’, na vendosën në stane bagëtish. Brenda 24 orëve kanë vdekur 30 fëmijë nga mungesa e ushqimit dhe mungesa e higjenës. Kjo situatë alarmoi ministrinë e Brendshme, dhe atëherë na hoqën nga kampi Toranit dhe na vendosën në kampin e Tepelenës. Në kampin e Tepelenës kam ndenjur nga mosha 4 vjeçare deri në moshën 8-vjeçare. Fëmija i regjistron ngjarjet dhe i mban mend të gjitha. Fëmijët janë engjuj dhe këta engjuj ishin të rrethuar me tela. E dhimbshme ishte për nanat të rritnin fëmijët mes telave. Kampi Tepelenës ishte i përbërë nga pleq, plaka, fëmijë.
Në Tepelenë kanë vdekur jo vetëm 300 fëmijë, por 700-800 njerëz dhe më e tmerrshmja është fakti se ata nuk kanë as varre. Nuk dimë ku janë eshtrat e tyre. Aty çdo ditë kishte vaj. Çdo ditë kishte fëmijë që vdisnin nga urija, nga sëmundjet”,- ka thënë Miraka.
Kjo çështje u rikthye në vëmendjen e publikut, pas deklaratës së historianit Pëllumb Xhufi, i cili tha se kushtet nuk ishin dhe aq të këqija gjatë një debati politik.
