Ueli Steck, alpinisti i njohur zviceran ka ndërruar jetë sot në malin Everest në Nepal. Sipas medieve të huaja, vdekja ka ardhur si pasojë e mungesës së oksigjenit.
Steck ka vdekur në përpjekje për t’u ngjitur, pasi ishte në një zonë ku ka munguar oksigjeni.
Arineta Mula, alpiniste nga Kosova ishte takuar me të ndjerin vetëm para 4 ditësh, më 26 prill.
“Ishte kureshtar prej nga jemi dhe për Kosovën dhe ishte i lumtur që na takoi këtu”, ka shkruar alpinistja nga Kosova, e cila tashmë gjendet në Everest.
Trupi i Ueli Steck është tërhequr me ndihmën e helikopterit dhe është nisur për në Kathmandu.
