Vasilika Hysi është kandidate për Ambasador i Jashtëzakonshëm dhe Fuqiplotë i Republikës së Shqipërisë, në Misionin e Përhershëm të Republikës së Shqipërisë pranë Zyrës së Kombeve të Bashkuara dhe Organizatave të tjera Ndërkombëtare në Gjenevë.
Ditën e sotme Hysi ka prezantuar programin e saj përpara Komisionit Parlamentar për Punët e Jashtme.
Qendrimi ndaj kandidaturës së saj, ka qenë tepër pozitiv nga kolegët socialistë. Ata janë shprehur se Hysi është një “pionere” e të drejtave të njeriut në Shqipëri, dhe kandidatja më e përpshtatshme për postin.
Kolegët demokratë e kanë parë me skepticizëm. Ashtu si për kandidatët e tjerë, ata janë shprehur se nga të gjitha kandidaturat askush nuk është diplomat, ndërsa të gjithë janë njerëz që lidhen në një mënyrë apo tjetrën me partinë në pushtet.
Megjithatë, Hysi ka shpalosur programin e saj të gjatë dhe të detajuar.
“Misioni në Gjenevë do të ndjekë zhvillimet ekonomike. Të drejtat e njeriut janë një gjë e rëndësishme, por edhe ekonomia është tepër e rëndësishme. Kontributi për konferencën e 13-të botërore të ekonomisë që do të mbahet në Abu-Dhabi. Angazhimet që Shqipëria ka në kuadër të marrëveshjeve, iniciativave e të tjera. Do të ndalesha te UNECE, një komision shumë i rëndësishëm, për politika si menaxhimi i popullsisë, plakja e popullsisë, ndryshimet klimatike. Nëse unë do të zgjidhem dhe do të përfaqësoj misionin, do të kemi mundësi që roli të rritet edhe në këtë aspekt.
Misioni në Gjenevë ndjek edhe shumë angazhime të tjera, ka shumë konventa ku Shqipëria është palë. Në fushën e Shëndetësisë, OBSH, të pronësisë intelektuale, të unionit të telekomunikacionit, ka mundësi për rritje më tej. Shqipëria kontribuon në sigurinë botërore, është një kontriubuim që na bën krenar. Do të doja ta rrisnim edhe në fusha të tjera. Shqipëria është shumë dinjitoze në sigurinë në rajon edhe më gjerë. Në Gjenevë ka disa organizata që ndikojnë në paqen në rajon, në një shoqëri të qëndrueshme, të paqshme”, u shpreh ndër të tjera Hysi.
