Vasil Ruci, legjenda e futbollit vlonjat është rikthyer edhe njëherë në qendër të vëmendjes, por këtë herë jo për artin që ai dhuron me top. I lënë në harresë për më shumë se një dekadë nga FSHF, Rucit nuk i ka pëlqyer fakti që në momentin që ai po i kritikon ata i bëjnë një ftesë për të marrë pjesë në mbrëmjen gala. Nuk i ka pëlqyer që ka qenë kaq i anashkaluar nga FSHF-ja dhe në këtë fundvit u ka dhënë një përgjigje epike drejtuesve të FSHF-së.
Pikërisht me një mesazh fare të shkurtër përmes telefonit. “Panorama Sport” zbulon se, pak ditë para mbrëmjes Gala të FSHF-së, një prej zyrtarëve të lartë të kësaj të fundit, në emër të institucionit i ka dërguar një mesazh në numrin e tij personal Vasil Rucit, duke e ftuar zyrtarisht për të marrë pjesë të premten në ceremoninë e fundvitit. Mirëpo, ish-sulmuesi bëri një “driblim” të rrallë, teksa, pasi refuzoi të pranonte ftesën, i ktheu edhe një përgjigje nga ato që i kanë të gjitha brenda.
“Faleminderit për ftesën pas 15 viteve, por kam frikë të vij se mos më jepni bukë të helmuar si Petro Nini Luarasit…”, ishte mesazhi epik i Vasil Rucit.
KONFIRMIMI – Për të konfirmuar gjithçka, u kontaktua vetë legjendën e futbollit vlonjat. Ky i fundit sqaroi pse kishte refuzuar të merrte pjesë në ceremoninë e FSHF-së, ku mes të tjerave u nderuan edhe 13 ish-futbollistë, të cilët kanë luajtur edhe në periudhën kur Ruci bënte “çudira” me topin.
“Në fakt, ata kanë 15 vite që nuk më thërrasin në ceremonitë që bëjnë. Mirëpo, tani që unë i kritikoj, më ftuan. Më erdhi një mesazh në celular, ku më bëhej me dije se isha i ftuar në mbrëmjen që do të organizohej të premten në Tiranë. Numri ishte i një zyrtari të lartë të FSHF-së, por emri pak rëndësi ka ta them tani”, është shprehur fillimisht Ruci, për të treguar më pas historinë e mesazhit. “Menjëherë i ktheva këtë SMS që ju po më tregoni. Tani çfarë duan këta nga unë!?
Nuk u servilosem dot, sepse nuk e kam për karakter. U thashë që faleminderit pas gjithë këtyre viteve, por kam frikë se buka që do të ha është me helm dhe do të ma bëni si Petro Nini Luarasi”, tregon ish-sulmuesi i Flamurtarit të artë të viteve ’80. Në fund, Ruci kërkon ta mbyllë me një shprehje që i ka ngelur në mendje nga i ati i tij.
“Babai më ka thënë një fjalë dikur dhe nuk mund ta harroj. Ne burrat kemi një kockë te gurmazi dhe ajo mban shumë. Unë jam nga ata që e kam kockën në gurmaz”. Gjatë viteve të fundit, Ruci ka qenë shpesh kritik me mënyrën se si FSHF-ja po administron kampionatin shqiptar. Kryesisht, ai ka akuzuar gjyqtarët duke iu referuar edhe urdhrave që marrin për të dëmtuar ekipe të caktuara, e më konkretisht Flamurtarin e këtij sezoni.
Vetëm pak javë më parë, Ruci u bëri thirrje katër ish-anëtarëve të Komitetit Ekzekutiv të FSHF-së që të japin dorëheqjen. Ish-sulmuesi vijon të jetë pjesë e administratës së klubit kuqezi, teksa nuk mungon në çdo takim të vlonjatëve, madje, shpesh i ngjan një tifozi ultras.
