Tekniku italian, Rodolfo Vanoli që është pretendent për të marrë postin e trajnerit të Kosovës, është shprehur se ka pranuar kërkesën nga FFK. Por si fillim ai do që ti plotësohen disa kushte, pasi është një kombëtare e vogël dhe ka kërkuar të komunikojë me disa lojtarë e specialistë.
“Kam pasur kontakte me njerëz afër FFK-së, të cilët më kanë pyetur nëse jam i gatshëm. Kam thënë ‘po’ me disa kushte, sepse të jesh një Kombëtare e re, për t’u ndërtuar, duhet të punosh në një mënyrë të ndryshme. Ne trajnerët italian dëshirojmë të sjellim filozofinë tonë dhe do të doja ta dërgoja futbollin kosovar në një nivel tjetër”, ka thënë Vanoli për TMW Radio.
Në fund, Vanoli tha se ka folur me Behramin për të kuptuar më shumë dhe do të dëshironte të bisedonte edhe me Xherdan Shaqirin dhe të tjerët, të cilët do të mund ta ndihmonin.
Kosova është pa trajner që nga 9 nëntori, kur me marrëveshje të dyanshme u largua trajneri Albert Bunjaki, i cili e kishte drejtuar Kombëtaren e Kosovës nga viti 2009.
