Aktivistët kundër vaksinimit të fëmijëve u mblodhën në një protestë në Uashington. Lëvizja kundër vaksinave ka fituar aq shumë terren saqë doktorët janë të alarmuar. “Vetëm një epidemi fruthi mund t’i bindë prindërit se vaksinat shpëtojnë jetë dhe parandalojnë paaftësitë fizike”, thonë mjekët.
Aktivistët nuk i besojnë shkencës. Madje në të kundërt, ata besojnë se vaksinat mund të shkaktojnë çdo gjë, që nga autizmi dhe deri në alergji të rënda. Shumë prej tyre thonë se njohin fëmijë që janë dëmtuar nga vaksinat.
Për këtë çështje, ka pasur revoltë të prindërve edhe në Italinë fqinje. Por, në vendin tonë është bërë thirrje për vaksinim të personave që kanë lindur mes viteve 1980 deri në 1990, me arsyetimin se në këtë periudhe nuk është bërë vaksinimi i rregullt. Specialistët e ISHP-së pohojnë se në këtë 10-vjeçar duhet të bëheshin 2 vaksina, por shumë prej fëmijëve kanë bërë një të vetme. Gjithashtu, nga specialistët e ISHP-së është konstatuar se vaksinat në atë periudhë nuk janë ruajtur në kushtet e nevojshme për një vaksinim të efektshëm.
Duket se politikat e shtetit kanë ndryshuar për çështjen e vaksinimit. Ministrja e Ministrisë së Mirëqenies Sociale dhe Rinisë, Olta Xhaçka, në skemën e re të ndihmës ekonomike u ofron familjeve, pagesë shtesë për çdo fëmijë që ndjek shkollën dhe që vaksinohet. Qeveria “josh” me para shqiptarët e varfër, vetëm që të vaksinohen. Shumë po flitet për vaksinat, misteri është i madh, por deri tani në Shqipëri nuk është shënuar asnjë protestë kundër vaksinimit. ISHP-ja deklaron se vendi ynë futet tek shtetet më të mirëvaksinuara në botë.
Tiranatoday.com
