Presidenti ka hapur garën për plotësimin e vakancës në Gjykatën Kushtetuese. Ky njoftim vjen pas vendimit të Kolegjit të Posaçëm të Apelimit për të lënë në fuqi vendimin e Komisionit të Pavarur të Kualifikimit. Ky i fundit vendosi shkarkimin nga detyra të gjyqtares së Gjykatës Kushtetuese, Altina Xhoxhaj.
Presidenca njofton se:
“Është shpallur procedura e aplikimit për emërim gjyqtari në Gjykatën Kushtetuese të Republikës së Shqipërisë. Për plotësimin e “Vakancës së parakohshme” të krijuar nga përfundimi përpara kohe i mandatit, të ish-gjyqtares Znj. Altina Xhoxhaj”.
Ndërkohë kujtojmë që Gjykata Kushtetuese aktualisht është jashtë funksionit. Ajo aktualisht ka vetëm me dy anëtarë, Vitore Tusha që kaloi vettingun dhe kryetari Bashkim Dedja, i cili kaloi Komisionin e Pavarur të Kualifikimit, por dosja u apelua në Kolegjin e Posaçëm.
Pak ditë më parë, Presidenti Meta e përzgjodhi Vitore Tushën si propozimin e tij për kryetare të Kontrollit të Lartë të Shtetit, pasi kryetarit aktual Bujar Leskaj i përfundoi mandati.
