Majlinda Kelmendi siguron një tjetër medalje të artë në palmaresin e saj, teksa në finalen e madhe të Grand Prix të Tel-Avivit, ka arritur të mposhtë izraeliten Gili Cohen, në një sfidë që ka zgjatur vetëm 35 sekonda.
Në kategorinë deri 52 kilogramë, Kelmendi u kualifikua në çerekfinale, duke mposhtur gjeorgjianen Tatiana Levytska-Shukvani. Zvicerania Fabienne Kocher nuk ishte problem për kampionen olimpike të arrinte gjysmëfinalen e turneut, ashtu si edhe rumunia Andreea Chitu nuk mundi ta pengonte furinë kosovare të shkonte në finale e të rrëzonte ëndrrat e vendases Cohen në 35 sekonda.
Medalja e artë e fituar nga Vajza e Artë e Kosovës do ta ndihmojë atë të lëvizë shpejt në renditje duke përmirësuar vendin e 15 aktual, ndërsa do të tentojë të rifitojë titullin kampion bote dhe të parin për të nga 2014. Kelmendi deri tani ka fituar 26 medalje të arta, 5 të argjendta dhe 6 të bronxta. Xhudistja është sportistja më e suksesshme në Kosovë.
