Ishte 17 qershori i vitit 1972 kur Frenk Uills, një roje sigurie që punonte në kompleksin e zyrave të Hotel Uotetgejt në Uashington, vuri re një copë shiriti ngjitës në derën midis shkallëve dhe parkimit nëntokësor dhe njoftoi menjëherë policinë.
Kur mbërriti kjo e fundit, 5 burra – Bernard Barker, Virxhilio Gonzalez, Eugenio Martinez, Xhejms W.Mekord Xhunior dhe Frank Starxhis – u zbuluan dhe u arrestuan për hyrjen e paligjshme në selinë e Komitetit Kombëtar Demokratik, organizata kryesore që merret me organizimin e fushatës elektorale dhe mbledhjen e fondeve në Partinë Demokratike në SHBA.
Historia e skandalit Uotergejt
Të arrestuarit ishin duke punuar në një operacion spiunazhi që përfshinte mes të tjerash edhe vetë presidentin e atëhershëm Riçard Nikson. E vërteta u zbulua nga 2 gazetarët e të përditshmes “The Washington Post”, Bob Uduord dhe Karl Bernshtein, edhe me ndihmën e nëndrejtorit të atëhershëm të FBI-së, Mark Felt.
Për Niksonin, i përfshirë drejtpërdrejt në atë akt spiunazhi, ishte fillimi i fundit të presidencës dhe karrierës politike. Opinioni publik amerikan e kuptoi atë se çfarë po ndodhte pasi “The Washington Post” botoi79 artikuj në faqen e saj parë, të cilat u pasuan nga investigimet e 2 gazetarëve.
Investigimi i “The Washington Post”
“The Washington Post”, ishte një nga gazetat e pakta që ndoqi rregullisht progresin e hetimeve mbi atë operacion. Drejtori i gazetës, Benxhamin Bredli, vendosi t’ia caktojë ndjekjen e kësaj çështje me kohë të plotë 2 gazetarëve të rinj në moshë, entuziastë dhe të vendosur.
Bob Uduord kishte qenë dikur një oficer i Marinës Amerikane, ndërsa Karl Bernshtein kishte tashmë një karrierë 12-vjeçare në gazetari. Uduord dhe Bernshtein treguan vendosmëri dhe mprehtësi gjatë investigimit të tyre. Ata nuk hezituan të kontaktonin qindra njerëz për të mbledhur informacione, teksa ndoqën edhe pistat hetimore që me sa duket u anashkaluan nga hetuesit federalë.
Filmi
“Të gjithë njerëzit e presidentit”, është filmi më i famshëm që është bazuar mbi ngjarjet e skandalit Uotergejt. Në këtë film, në rolin e gazetarëve interpretojnë aktorët e mirënjohur Robert Redford dhe Dastin Hofman. Bazuar në librin me të njëjtin titull të shkruar nga gazetarët Bob Uduord dhe Karl Bernshtein, filmi përshkruan investigimin e “The Washington Post” që çoi në skandalin Uogergejt të vitit 1974.
Filmi rezultoi të ishte një sukses i madh si për audiencën ashtu edhe kritikët. Filmi mori tetë nominime përçmimin Oskar, duke fituar 4 prej tyre, përfshirë atë të Uilliam Goldman për skenarin më të mirë jo-origjinal dhe Xhejzën Robards për aktorin më të mirë dytësor.
Burimi i lajmit: https://libreriamo.it/storie/watergate-storia-scandalo-politico/
Përshtatur nga TIRANA TODAY
