Në një konferencë për shtyp nga Ministria e Brendshme, ministri Sandër Lleshaj dha ultimatumin për mbylljen e të gjitha kazinove dhe basteve sportive në Shqipëri. Ai tha në formë të prerë se pas 1 Janarit, bastet dhe kazinotë do të konsiderohen si parcela kanabisi. Lleshaj shtoi se drejtues të Policisë së Shtetit, punonjës të administratës Tatimore, do të vihen përballë ligjit, për shkeljet në zonat e tyre.
“Shumë pronarë të lokaleve dhe subjekteve kanë marrë masat për mbylljen. Nga data 1 Janar, kjo veprimtari bëhet e paligjshme, dhe ndalimi i saj bëhet detyrim i rëndësishëm për policinë.
Nga 1 Janari, çdo lokal ku ushtrohet veprimtaria e lojërave të fatit duhet të cilësohet si një parcelë kanabis, dhe e tillë duhet të jetë edhe qasja. Në këtë këndvështrim, e plotë dhe e pandashme do të jetë përgjegjësia ligjore për administrimin e zonave.
Drejtues të Policisë së Shtetit, punonjës të administratës Tatimore do të vihen përballë ligjit, për shkeljet në zonat e tyre. Zbatimi i këtij ligji, do të thotë ndalimi i një vepre penale. Do të pësojë goditje korrupsioni dhe do të inkurajohet puna e ndershme. Për tu realizuar kjo veprimtari, duhet të shtohen kontrollet, por edhe bashkëpunimi me institucionet dhe qytetarët. Ky është mesazhi kyç që doja të përcillja”, tha Lleshaj.
