Një shans më shumë për të qenë më të përgatitur dhe më në formë ekipet që do të marrin pjesë në eliminatoret e Euro 2020 është National League. Të mërkurën e 24 janarit hidhet në Lozanë shorti i grupeve të këtij kompeticioni, faza finale e të cilit luhet në verën e 2019-ës. Kuqezinjtë do të mësojnë kundërshtarët mesjavën e ardhshme, por si funksionon kompeticioni? Në këtë ligë do të marrë pjesë edhe Shqipëria e cila sipas ndarjes do ti përkasë grupit C.
Në shtator fillojnë ndeshjet e një turneu të përafërt me atë të klubeve për nga filozofia, struktura dhe koha. Pak a shumë, është si një Champions për kombëtaret: grupe, eliminime direkte dhe finalja. Giorgio Marchetti, zv/sekretari i UEFA-s dhe drejtori i kompeticioneve, shpjegon gjithçka:
“Duhej një kalendar ndërkombëtar, sepse kishte shumë data të lira. Menduam t’i transformojmë disa miqësore në ndeshje zyrtare, me më shumë interes sportiv dhe ekonomik. Miqësoret nuk zhduken, por janë më pak. Për skuadrat e mëdha është e lehtë të luajnë miqësore, jo për të voglat.
Nuk është shumë e komplikuar. 55 kombëtare europiane ndahen në 4 seri dhe çdo seri ka 4 grupe. Fitueset e 4 grupeve kualifikohen dhe në fund fitueset e grupeve të nivelit të parë luajnë turneun në një fazë finale.
Kualifikueset e Europianit nuk fillojnë më në shtator, por në mars, pas grupeve të Nations League. Shorti i 10 grupeve për kualifikueset e Europianit do të bëhet pikërisht në bazë të rezultateve të Nations League. 10 të para do të jenë në vazon e parë. Pastaj, 2 të fundit e serisë A dhe 8 të parat e serisë B, në vazon e dytë. E kështu me radhë.
Pas grupeve kualifikuese përcaktohen 20 vende për Europianin dhe për 4 vendet që mbeten do të shihet klasifikimi i Nations League. Katër më të mirat e çdo serie, që nuk janë kualifikuar, do të bëjnë ndeshje shtesë.
Do të ketë më shumë spektakël. Është pak a shumë si kompeticionet e kluebeve, një turne i madh me grupe, eliminim direkt dhe finale. Ka interes edhe për shitjen e të drejtave televizive për trevjeçarin 2018-21. Nga viti 2018 do të jetë UEFA që do të menaxhojë paketën e të drejtës televizive për të gjitha ndeshjet e kombëtareve europiane: Nations, kualifikuese europiani dhe botërori, si dhe miqësoret. Janë më shumë se 2 mijë ndeshje me vlerën e 2 miliardë eurove në 4 vjet.
Në anën tjetër është filozofia e turneve për klube, ngjitje dhe rënie. Një princip sportiv, që parashikon rrezikun e rënies nga kategoria, por edhe të fitimit të një trofeu të rëndësishëm mes Europianit dhe Botërorit.
VAR-i? UEFA po e ndjek me interes eksperimentin e FIFA-s dhe pret të njohë vendimet e reja. VAR është diçka komplekse, e rëndësishme është që të përmirësohet futbolli. Nëse funksionon, UEFA do ta vlerësojë”, – ka shpjeguar Marchetti.
