UEFA ka publikuar sot shpërndarjen e fondeve për 901 klube nga 55 federata anëtare, të cilat kontribuan me lojtarë në ndeshjet e ekipeve kombëtare gjatë ciklit që shkon nga Liga e Kombeve 2020/21 deri në finalet e Euro 2024. Në total, është regjistruar një shifër rekord prej 233 milionë eurosh.
Kjo shumë përfshin përfitimet për klubet që dhanë lojtarë për:
Ligën e Kombeve 2020/21 dhe 2022/23
Kualifikueset për Euro 2024
Finalet e Euro 2024
Megjithatë, ky bujarim i UEFA-s nuk është reflektuar në mënyrë domethënëse për klubet shqiptare. Vetëm tre klube të Kategorisë Superiore kanë përfituar, me një total prej 150 mijë eurosh – një shumë shumë më e ulët krahasuar me vendet e tjera të rajonit apo edhe me ciklin e mëparshëm.
Ja ndarja për kampionatin shqiptar:
Tirana: 84 mijë euro
Egnatia: 36.500 euro
Partizani: 29 mijë euro
Këto shifra janë cilësuar si “lëmoshë”, duke pasur parasysh që në të kaluarën klubet shqiptare kanë përfituar më shumë nga ky mekanizëm.
