GJKKO ka lënë në burg inspektorin e IMT-së së Tiranës, Gerald Fuçia, i arrestuar me urdhër të SPAK 3 ditë më parë, në kuadër të një hetimi të nisur nga Prokuroria e Posaçme për korrupsion në lidhje me vendosjen e tendave.
Zyrtarët e IMT u arrestuan në zonën e Kombinatit, në ambientet e lokalit të ish-deputetit Mark Frroku. Atyre iu sekuestrua edhe një shumë parash të marra ryshfet nga një biznes i interesuar për vendosjen e tendës.
Gjyqtarja Etleva Deda pranoi kërkesën e prokurorit të SPAK, Sotir Kllapi, dhe caktoi ndaj Fuçias masën e sigurisë “arrest me burg”.
Në seancën me dyer të mbyllura, inspektori Fuçia mohoi çdo përfshirje në ngjarje, duke deklaruar:
“Nuk e njoh fare qytetarin, as e kam kontaktuar, as takuar, as nuk di gjë për ryshfetin. Deklaroj me përgjegjësi morale dhe ligjore se nuk kam lidhje me këtë histori. E ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike”.
Avokatja e tij Xhoi Nela kërkoi një masë më të butë sigurie, deri në qartësimin e plotë të rrethanave. Ajo fajësoi inspektorin tjetër të IMT, Klajdi Zhilla i cili u shpall në kërkim, ndërsa mëngjesin e kësaj të shtune u vetëdorëzua në Policinë e Tiranës.
“Klajdi Zhilla është personi që ka mbajtur kontakt me personin e dëmtuar dhe ka shkuar edhe ka tërhequr shumën monetare. Kjo shumë i është dhënë kamarierit të lokalit Cormeun për ta mbajtur aty nga vetë Klajdi Zhilla dhe policia ka sekuestruar këtë shumë që Klajdi Zhilla kishte marrë tek qytetari. është Klajdi Zhilla që ka patur kontaktet me qytetarin dhe është ai që ka tërhequr shumën tek banaku i lokalit që kapi Policia. Dhe pikërisht kjo shumë ka dalë nga buxheti i shtetit për efekt të këtij operacioni”, mësohet të jetë shprehur avokatja mbrojtëse e Gerald Fuçisë.
Klajdi Zhilla dyshohet për korrupsion pasiv. Në dëshminë e tij të parë para Policisë, edhe Zhilla ka mohuar akuzat.
Denoncimi për zyrtarët e IKMT u bë nga një qytetar, pronar lokali, i cili ka kallëzuar se dy inspektorët i kishin kërkuar 1,000 euro ryshfet për një tendë të vendosur pa leje.
