Alban Kukaviqi, 60-vjeçari i cili në muajin korrik u plagos nga helika e një gomoneje, në gjirin e Shën Janit në gadishullin e Karaburunit, ka ndërruar jetë në Turqi.
“Sot, në Karaburun, një mjet lundrues tip gomone, me drejtues shtetasin F. T., gjatë ankorimit në molin e vjetër të ish-ushtrisë në gjirin e “Shën Janit”, aksidentalisht me helikën e mjetit lundrues ka dëmtuar në këmbë shtetasin A. K., banues në Tiranë, i cili kishte zbritur nga një anije turistike në det afër këtij moli. (Nuk kemi të bëjmë me zonë plazhi)”, njoftoi Policia më 13 korrik.
60-vjeçari i cili kishte shkuar në pushime me familjen, pasi u plagos nga gomonia në këmbë, u nis drejt Turqisë për të marrë mjekim më të specializuar, por nuk i mbijetoi aksidentit të rëndë.
Alban Kukaviqi një ish-basketbollist ka humbur jetën gjatë operacionit të tretë që po bënte për këmbën. Ai do vinte një protezë, por për shkak të dobësimit nga dy operacionet e para, ai nuk arriti të mbante narkozën.
”Thellësisht të prekur nga humbja e parakohshme e kolegut tonë të dashur, Alban Kukaviqi, i cili në karrierën profesionale 31-vjeçare, pranë këtij institucioni, ka dhënë kontribut të çmuar në inspektimin e punës.
Stafi i Inspektoratit Shtetëror të Punës dhe Shërbimeve Shoqërore i shpreh familjes ngushëllime të sinqerta!
Lamtumirë, i dashur koleg! Mënçuria, mirësia dhe humori jot do të na mungojë shumë”,- bën me dije Inspektoratit Shtetëror i Punës, ku Kukaviqi ishte punonjës.
