UEFA ka zyrtarizuar dje përfitimet e skuadrave evropiane për aktivitet e sezonit të kaluar në Ligën e Kampioneve dhe Ligën e Europës, ku përfshiheshin edhe ato të klubit të Skënderbeut.
Sipas përllogaritjeve të UEFA-s, skuadra e cila arriti deri në fazën në grupe të turneut, ka siguruar një total prej 3,74 milionë eurosh, vetëm falë paraqitjes në Ligën e Europës ku u kualifikua në grupe duke e nisur nga turi i parë eliminator.
Llogaritë pak a shumë ishin bërë me kohë, pasi korçarët përtonin 2,6 milionë euro si shumë fikse e më pas 260 mijë euro për fitore e 120 mijë euro për barazim. Ajo që nuk ishte llogaritur nga këto fitime, ishte shifra që do t’i vinte nga tregu i të drejtës televizive. Vetëm falë këtij të fundit, në arkat e klubit korçar janë shtuar pak më shumë se 500 mijë euro.
Duhet theksuar se vetëm skuadrat nga Izraeli, Moldavia, Bjellorusia dhe Maqedonia që morën pjesë në fazën në grupe të Ligës së Kampioneve në sezonin e kaluar kanë përtuar më pak nga tregu i të drejtës televizive se sa ekipi shqiptar.
Këto para ndahen në bazë të rezultateve të arritura nga shtetet e caktuara dhe sa interes ka pasur për takimet e ekipeve në fjalë.
Për shembull skuadra e Evertonit, edhe pse nuk kaloi grupin ashtu si Skënderbeu, vetëm nga tregu i të drejtës televizive ka përtuar rreth 11 milionë euro.
