Një nga personat që u plagos dje gjatë grabitjes në Fier, ka ndërruar jetë sot në spitalin e Traumës.
Agur Vrenozi është personi që u plagos rëndë në kokë nga grabitësit e një Exchange në Fier, ngjarje kjo që ndodhi rreth orës 10:55.
Vrenozi, mik i pronarit të Exchange ka ndërhyrë në tentativë për të ndaluar grabitësit, por këta të fundit kanë bërë rezistencë dhe njëri prej tyre e ka qëlluar në kokë atë.
53-vjeçari është dërguar në spital, ku i është nënshtruar një operacioni. Gjendja e tij ka qenë mjaft kritike, teksa pas operacionit ai ka qëndruar rreth 5 orë në komë, derisa ka ndërruar jetë.
I plagosur ka mbetur edhe pronari i Exchange, Gëzim Hoxha, 64 vjeç. Pas ndërhyrjes së policisë, kjo e fundit ka arrestuar tre autorët e grabitjes, të cilët janë Zini Fyraj, 37 vjeç, banues në Sevaster, Vlorë, Lulëzim Demiraj, banues në Vajzë, Vlorë dhe Dashamir Gergali, 41 vjeç, banues në Zhupan, Fier.
