Emisioni investigativ “BOOM” në RTV Ora ia doli sërish tu vijë në ndihmë qytetarëve. Rasti i trajtuar sot ishte ai i një 18 vjeçari, nxënës i vitit të dytë në shkollën profesionale “Karl Gega”.
Prej dy javësh ai endej rrugëve pasi ishte përjashtuar nga drejtuesit e konviktit të Hoteleri Turizmit.
Shkak ishte bërë arrestimi i të riut nga policia me një cigare hashash, që ja kishte gjetur në xhep.
Ndalimi i tij ishte bërë jashtë konviktit dhe në dhomën ku qëndronte, policia nuk kishte gjetur asgjë të jashtëligjshme.
Por megjithatë konvikti kishte marrë masën radikale për ta përjashtuar përgjithmonë, ndërsa shkolla nuk i kishte nxjerrë probleme.
Denoncuesi: Jam në vit të dytë për hidraulik te “Karl Gega”, dhe në konvikt te Hoteleri Turizmi. Më kapi policia me hashash dhe këta më nxorën probleme. Më erdhën kontroll te konvikti dhe nuk gjetën gjë. Kur më kapën po rrija në trotuar, e kisha në xhep. Këta më përjashtuan. Në polici qëndrova dy ditë dhe dola me ‘detyrim paraqitje’. Ka dy javë që rri rrugëve. Nuk kanë arsye pse të më përjashtojnë, në shkollë nuk kam probleme. Ngaqë nuk kam ku të ri jam bërë i sëmurë, kam marrë raport. Nuk kam mundësi të shkoj dhe të vij përditë.
Pas ndërmjetësimit të “BOOM”, drejtoresha e Përgjithshme e Konvikteve vendosi ripranimin e nxënësit në konvikt me të vetmin kusht që të zbatojë rregullat dhe detyrat e institucionit.
