Sikundër e njoftoi edhe më herët përmes një prononcimi për mediat, deputeti socialist Taulant Balla ka paditur kreun demokrat, Lulzim Basha. Kallëzimin në fjalë deputeti socialist e ka bërë në Gjykatën e Shkallës së Parë për Krimet e Rënda.
Balla shigjeton Bashën për nxjerrjen e sekretit hetimor, në lidhje me dy automjetet tip “Toyota Yaris” që u bllokuan në portin e Durrësit, brenda të cilave u gjetën rreth 3.4 milionë euro. Një ditë më parë, në prononcimin për median, Balla mohoi kategorikisht lidhjet me këtë ngjarje, duke thënë se është i gatshëm t’i bëhet gjyqi në sheshin “Skënderbej”, në rast se i gjendet edhe lidhja më e vogël.
“Njëri prej atyre që zgërdhihen më shumë ( duke treguar me gisht nga Balla, që po qeshte bashkë me Ramën) ka qenë në Gjermani para tre ditësh. Mbajeni mend këtë që po ju them! Dhe ka porositur një Toyota Yaris! Por ta kanë zbuluar Toyotën, o zgërdhimtar, bashkë me 1.5 milion euro të drogës brenda! Vazhdo qesh, do ta shikosh se çfarë do të tundet para hundës shumë shpejt”, ka thënë Basha ditën e enjte në Kuvend, e që sipas kreut të grupit të PS-së ka përhapur qëllimisht sekretin hetimor.
Debati i ashpër mes palëve ndodhi pasi sipas Bashës, Balla ka dalë garant për hyrjen e parave në vend. “Mund t’ju them vetëm tre gjëra. E para, që paratë janë të një prej bandave më të rrezikshme të trafikut të drogës, aktive kryesisht në zonën e Elbasanit, por edhe të gjithë Shqipërisë.
E dyta, Taulant Balla kishte marrëveshje për të garantuar hyrjen e këtyre parave pa problem në Shqipëri.
E treta, policia shqiptare ka qenë nën presionin e një prej partnerëve tanë për të vepruar. Është një nga vendet partnere, i cili është skeptik përsa i përket kushteve të Shqipërisë për integrimin, në veçanti kundër krimit dhe korrupsionit”, tha Basha.
