Një 31-vjeçar është vënë në prangat e policisë, pasi u kap me doza lënde narkotike, gati për shitje.
Mësohet se për veprime të mëtejshme materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
Njoftimi i policisë:
Goditet nga Komisariati i Policisë Nr. 6, një rast i shitjes së lëndëve narkotike, në doza. Sekuestrohen doza lënde narkotike kanabis, gati për shitje, vihet në pranga 31-vjeçari që i posedonte.
Shërbimet e Komisariatit të Policisë Nr. 6, në bashkëpunim me specialistët e Seksionit për Hetimin e Narkotikëve, në vijim të veprimeve intensive operacionale të kryera në kuadër të megaoperacionit policor mbarëkombëtar, antidrogë, të koduar “Tempulli 2”, pasi kanë siguruar informacione se një shtetas shiste lëndë narkotike kanabis, në doza, në Kombinat, kanë organizuar punën për kapjen dhe vënien e tij përpara përgjegjësisë penale.
Si rezultat, shërbimet e Komisariatit të Policisë Nr. 6, në Kombinat, kapën shtetasin E. N., 31 vjeç, banues në Tiranë.
Nga verifikimet e kryera ka rezultuar se ky shtetas e siguronte lëndën narkotike në sasi dhe më pas e ndante në doza, të cilat i shiste në Kombinat.
Në cilësinë e provës materiale u sekuestruan doza lënde narkotike kanabis, gati për shitje.
Në vijim të veprimeve u bë arrestimi i shtetasit E. N. dhe materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
