29-vjeçari Ervid Palaj nga fshati Shirq i Shkodrës, humbi jetën dje në plazhin e Velipojës. Motra e tij kishte planifikuar të organizonte ceremoninë dasmore të dielën e ardhshme. I riu kishte vetëm 6 muaj që ishte fejuar, ndërsa prej kohësh punonte në qendrën sociale në Dajç, si punonjës social.
Ndërsa e fejuara e tij ka rreth 4 vite që punon në Bashkinë Shkodër, si pjesë e Drejtorisë së Shërbimeve Sociale. Ai u mbyt gjatë tentativës për të shpëtuar të fejuarën dhe motrën.
Ngjarja e rëndë ka ndodhur në Lagunën e Vilunit, ku i riu ndodhej bashkë me të fejuarën dhe motrën, për të kaluar disa orë pushime në breg të detit. Ndërsa të tre ndodheshin në ujë, trazimi i detit për shkak të baticës ka bërë që dy vajzave t’u rrezikohej jeta, dhe për këtë arsye i riu është përpjekur t’u japë atyre ndihmë me sa mundej, shkruan ‘Panorama’.
Ndonëse është ndihmuar nga disa pushues të tjerë, 29-vjeçari nuk ia ka dalë dot mbanë. Qytetarë të rastit kanë hedhur dy kamerdare, duke menduar se djali do të ishte në gjendje të dilte me forcat e tij. Por, dallgët e mëdha e kanë mundur atë dhe për pasojë 29- vjeçari nuk arriti t’ia dilte dot.
