Sefer Seferi është boksieri më në zë shqiptar i momentit pasi sonte në mbrëmje do të përballet në ring me një ish-kampion bote të pamposhtur. Në Manchester Arena të Anglisë me fillim në orën 23:00, Seferi do të përballet me Tyson Furyn i cili rikthehet të duelojë pas një shkëputje 3 vjeçare.
Seferi ka folur në një intervistë për Blick para duelit, ku në matje zyrtare u duk një dallim i madh në peshë. Por, dallimi në peshë duket se nuk është problem për Seferin, i cili thotë se do të luftojë për të fituar. “Kam shumë respekt për të. Jam boksier i guximshëm. E respektoj Tyson Furyn. Por, në ring jemi të dy boksierë. Të dy jemi nga mishi dhe ashti dhe ai që është më i miri do të fitojë”.
Ai e ka ditur se unë nuk do të bij në provokimet e tij, dhe ai ka qenë korrekt. Ai më ka respektuar, më ka thënë se jam i fortë dhe prandaj e kam respektuar edhe unë. Ai është boksier klasi botëror. Fury ka 130 kilogram, por kjo nuk është problem. Gëzohem shumë për këtë duel. Nuk jam nervoz, nuk kam frikë. E di çka po më pret, jam boksier dhe unë dua të fitoj. Dua ta rrëzoj Tyson Furyn. Gjithçka do të tregohet në ring”, deklaroi Sefer Seferi për Blick.ch nga Mançesteri. Pikërisht në Manchester Arena edhe do të zhvillohet dueli i madh mes shqiptarit, Sefer Seferi dhe boksierit britanik, Tyson Fury.
