Turqia mund të shqyrtojë pjesëmarrjen në operacione shumëkombëshe për çminimin në Ngushticën e Hormuzit nëse arrihet një marrëveshje paqeje mes SHBA-së dhe Iranit, raportoi agjencia shtetërore turke Anadolu duke cituar ministrin e Jashtëm turk Hakan Fidan.
Duke folur për gazetarët në Londër, Fidan tha se Turqia “do të ishte e hapur” për t’u përfshirë në një koalicion që synon pastrimin e minave detare në ngushticë sapo të arrihet një marrëveshje, duke e cilësuar këtë si një përpjekje “humanitare”.
Megjithatë, ai theksoi se Ankaraja nuk do të marrë pjesë në operacione që mund ta pozicionojnë Turqinë si palë në një konflikt të ri. Sipas tij, vendi do të shmangë çdo rol që mund të nënkuptojë rreshtim në rast të rifillimit të përplasjeve.
Fidan u shpreh se një marrëveshje gjithëpërfshirëse mund të rikthente një status quo të negociuar, duke garantuar kalim të lirë dhe pa tarifa në Ngushticën e Hormuzit. Në të kundërt, palët do të duhet të kërkojnë mënyra të reja për zgjidhje.
Pas nisjes së sulmeve nga SHBA-ja dhe Izraeli ndaj Iranit më 28 shkurt, Irani reagoi duke bllokuar në mënyrë efektive Ngushticën e Hormuzit duke kërcënuar të sulmojë çdo anije që nuk merr leje për të kaluar.
