Prokuroria e Stambollit ka nxjerrë dy urdhër-arreste për historianët turk të cilët fyen themeluesin e Republikës turke, Mustafa Kemal Ataturk.
Sipas agjencisë së lajmeve “Dogan”, qëndrimet e një kategorie historianësh në Turqi, lidhur me figurën e “Baba të Turqisë”, gjatë një programi televiziv dhe postimeve në rrjetet sociale, shkaktuan zemërim te një pjesë e mirë e intelektualëve në vend.
Ky gjest ka shkaktuar një “stuhi”polemikash pasi historiani Süleyman Yesilyurt kishte bërë publike gjatë një emisioni, se vajza e adoptuar e Ataturkut, ishte në realitet e dashura e tij.
Po ashtu, disa ditë më parë, një historian tjetër, Hasan Akar kishte shkruar në rrjetet sociale, se nëna e themeluesit të Republikës kishte punuar në një “shtëpi publike” nga ku pretendohet se kishte lindur Ataturkun, dhe se ai ishte “fëmijë ilegjitim”.
Kryeministri, Binali Yildirim ka dënuar ashpër këto deklarata duke i kërkuar drejtësisë të hetojë dhe të marrë masa.
Mustafa Kemal Atatürk ka qenë presidenti i parë i Turqisë në vitet 1923-1938, themeluesi i Republikës moderne turke.
