Donald Trump e ka uruar homologun e tij, Recep Tayyip Erdogan për suksesin e shënuar në referendumin për ndryshimet kushtetuese.
Lajmin e kanë bërë të ditur burime pranë pallatit presidencial të Erdoganit, për agjencinë e lajmeve Reuters.
Ndërkohë, ka reaguar edhe Departamenti Amerikan i Shtetit për referendumin e Erdoganit.
DASH ka thënë se është në pritje të një raporti përfundimtar, pasi i ka dëgjuar shqetësimet e ngritura nga vëzhguesit evropianë të referendumit të zhvilluar të dielën në Turqi për ndryshimet kushtetuese.
Por, teksa ky referendum u mbyll me sukses për Erdoganin, të shumtë janë qytetarët turq të pakënaqur nga ky rezultat.
Mijëra njerëz dolën mbrëmë në rrugët e Stambollit për të protestuar kundër rezultatit të referendumit, që i jep më shumë pushtet presidentit turk.
Sipas mediave turke, 13 njerëz janë arrestuar në qytetin Antalia, ndërsa, parregullsi janë identifikuar edhe nga Organizata për Siguri dhe Bashkëpunim në Evropë dhe Këshilli i Evropës.
Erdogan e fitoi referendumin me 51.4% të votave.
