Presidenti Donald Trump ka thyer heshtjen mëngjesin e kësaj të enjteje lidhur me dënimin e ish-avokatit të tij, Michael Cohen.
“Nuk e kam udhëzuar kurrë Michael Cohen që të thyejë ligjin. Ai ishte avokat dhe supozohet ta njohë ligjin. Prandaj quhet ‘këshilla e avokatit’ dhe një avokat ka përgjegjësi të madhe nëse bëhet një gabim”, shkroi Trump në Twitter.
Cohen u dënua me tre vjet burg të mërkurën për krime që përfshijnë dhënien e deklaratave të rreme Kongresit, evazion fiskal dhe pagesën e disa femrave gjatë zgjedhjeve të vitit 2016 për të heshtur lidhur me pretendimet se ato kishin marrëdhënie me Trump.
Vetë presidenti Trump i mohon këto akuza, ndërsa Cohen i atribuoi veprat e tij lidhur me Trump për shkak të ‘detyrës që kishte për të mbuluar veprat e tij të pista’.
Edhe pse Trump mohon të ketë udhëzuar Cohen për të thyer ligjin, komentet e tij lënë të hapur mundësinë se ai i tha Cohen të bënte pagesa që ishin sigurisht të paligjshme.
