Mediat sociale janë mbërthyer pas takimit që zhvilluan Trump dhe Putin, një ditë më parë në Helsinki. Mediat po shkruajnë se Presidenti i SHBA-ve Donald Trump ishte paraqitur mjaft i dobët përballë rivalit të tij më të fortë, Vladimir Putin në Helsinki.
Presidenti amerikan u akuzua se ishte futur në xhepin e Putin. Gjatë një konference shtypi pas bisedimeve private që zgjatën më shumë se dy orë, Trump habiti botën me një përgjigje ndaj një pyetjeje rreth ndërhyrjes së Rusisë në zgjedhjet e SHBA.
Ai duket se i hodhi poshtë përfundimet e arritura nga agjencitë e inteligjencës amerikane, duke thënë se Putin dhe Rusia nuk kishte ndërhyrë në zgjedhje.
Kjo bëri që përdoruesit e mediave sociale të postonin foto në Twitter dhe Instagram me meme që talleshin me Trump – shumë prej të cilëve e portretizojnë atë si një kukull fjalë për fjalë që përdoret nga Putin./TIRANA TODAY/
