I intervistuar nga Financial Times, Trump deklaroi se ai dhe qeveria e tij do të ndërhyjnë në situatën e krijuar në Korenë e Veriut. “Kina ka një ndikim të madh mbi Korenë e Veriut. Në këto kushte, Kina mund të vendosë të na ndihmojë ne me Korenë e Veriut, ose të zgjedhë të mos na ndihmojë. Nëse na ndihmojnë, kjo do të ishte shumë mirë për Kinën, por nëse nuk na ndihmojnë, nuk do të jetë mirë për askënd. A jam i sigurt se mund të dalim të suksesshëm edhe nëse ndërhyjmë vetë?! Absolutisht, po!” – deklaroi ai, pavarësisht se hezitoi të sqaronte konkretisht se çfarë nënkuptonte me lëvizje ndaj Koresë së Veriut.
Ai u shpreh se me këtë deklaratë kishte qenë majft i qartë. Shtetet e Bashkuara e kanë parë me shqetësim, forcimin e kapaciteteve ushtarake të koreano-veriorëve, si dhe një sërë veprimesh agresive, ku mund të përmenden testimet e bombave bërthamore dhe të raketave balistike.
Trump ka planifikuar të presë presidentin kinez, Xi Jinping, këtë javë në SHBA, ku ai synon ta bindë atë që t’i ndihmojë. Kina nuk i është përgjigjur komenteve të Trump të hënën e shkuar, por lëshoi një deklaratë duke thënë se Tillerson i kishte telefonuar diplomatit të lartë të vendit, Këshilltarit të Shtetit, Yang Jiechi, në lidhje me vizitën e Xi-së. Në një deklaratë, Yang tha se takimi kishte “rëndësi së madhe në marrëdhëniet Kinë-SHBA” dhe ishte e rëndësishme për “promovimin e paqes, stabilitetit dhe prosperitetit … për të gjithë botën.”
Në javët e fundit, ushtria amerikane vendosi edhe sistemin anti-raketë THAAD në Korenë e Jugut, një veprim që u kritikua nga Kina dhe Rusia.
