Mesfushori i Lazios, Sergei Milinkoviç-Saviç ka mbyllur një sezon fantastik në Serie A dhe debutimi në Botërorin “Rusi 2018” ishte fantastik për të. Merkato sa vjen dhe bëhet më e zjarrtë për mesfushorin serb dhe babai i tij ka menduar që ti hedhë më shumë benzinë zjarrit. Ndonëse në mënyrë indirekte, ai ka pranuar se Juventusi do të ishte destinacioni ideal për të birin, ndërsa sugjeroi që te Reali të transferohej pas të 25-ave.
“Duhet të shkojë te Juvja, pasi është skuadra perfekte për të. Pas 3 vitesh në Itali, tani Milinkoviç njeh shumë mirë gjuhën, kulturën italiane dhe Serinë A, ndaj në një shoqëri të fortë si ajo bardhezi, do të kishte mundësi të rritej akoma më shumë, por edhe të fitonte shumë tituj”, tha Nikola.
Babai i mesfushorit të Lazios, përveç Juventusit, nuk fshehu vlerësimet as për qytetin e Torinos, duke e cilësuar ideal për të punuar i qetë. Sa i përket Realit të Madridit, ai tha se Sergej ka ende kohë për t’iu bashkuar “Los Blancos”, ndoshta pas të 25-ave, kur të ketë arritur pjekurinë.
“Torino është një qytet më i mirë se Roma, për të jetuar dhe për t’u rritur, pasi është më i qetë dhe me më pak njerëz. Sa i përket Realit të Madridit, mendoj se ka ende kohë. Momenti ideal për t’u larguar nga Italia, do të jetë pas të 25-ave, kur të ketë arritur pjekurinë e duhur dhe të jetë bërë një futbollist me mentalitet fituesi”, deklaroi babai i mesfushorit të Lazios.
