Në një spot të përgatitur nga KE lidhur me hapjen e negociatave, e ka publikun kryeministri Rama nëpërmjet një statusi në “Facebook”. Në vetëm 38 sekonda material video, shikohen vetëm dy politikanë shqiptarë, dhe ata janë: Edi Rama dhe…Jozefina Topalli.
Kjo e fundit shfaqet nga mesi i videos, cilësuar si kartolinë nga Rama, ku në titra nën bustin e saj lexohet: “Shqipëria bëri zgjedhjen e qartë për të ndjekur rrugën drejt BE-së”.
Po pse është zgjedhur pikërisht Topalli për t’u lidhur vizualisht me këtë kumt?
Lexohet qartë në këtë zgjedhje një lloj sajdisje evropiane ndaj opozitës, për t’ia njohur dhe asaj meritat e rrugës së integrimit.
Po pse me Topalli si përfaqësuese e jo Basha, kreun aktual të PD-së, ndërkohë që ish-gruaja e fuqishme e demokratëve nuk është më aktive në politikë?
Mund të ishte vendosur dhe Bregu, përfaqësuesja simbol e PD-së në kauzën evropiane. Por gjithsesi, parë me etikën e ekuivalencës politike, duhej të ishte kryetari Basha.
Vështirë të besohet se ka qenë një pakujdesi, pasi nëse materiali është kuruar në Bruksel, çdo detaj shikohet me lupë dhe mirë përzgjidhet.
Kështu që mbetet, referuar kodeve të gjuhës politike, që vendosja e Topalli të përmbajë një mesazh. Njëri është fshikullimi i Bashës, e tjetri mospajtimi me faktin se figura si Jozefina Topalli duheshin mënjanuar.
Kjo e fundit, përveçse një përfaqësuese e kulluar e së djathtës politik, ishte dhe një ithtare e zellshme e diplomacisë integruese gjatë kohës që drejtoi Kuvendin shqiptar.
