Trishtimi i sulmuesit të Bayernit: Tërhiqem nga kombëtarja, stafi dhe Low…

Pas publikimit të listës përfundimtare të Gjermanisë për lojtarët që do të udhëtonin drejt Rusisë, ka ardhur edhe një lajm i hidhur për “panzerat”. Është sulmuesi i Bayern Munich, Sandro Wagner që ka dhënë dorëheqjen nga kombëtarja pasi nuk është përzgjedhur nga Joachim Low. Ai ka shpërthyer në lot që në momentin që ka dalë lista, ndërsa për “Bild” ka dhënë dhe lajmin shokues për të gjithë tifozët e tij. “Tërhiqem menjëherë nga kombëtarja”, tha Sandro.Ai shprehet se ky vendim nuk erdhi për arsye sportive. “Për mua është e qartë që me mënyrën time kam qenë gjithmonë i hapur, direkt dhe i sinqertë për të shprehur gjërat. Me sa duket, unë dhe stafi drejtues te Gjermania nuk shkonim”. Por Sandro, gjithsesi, nuk harron të mbështesë shokët e tij të skuadrës që do të shkojnë në Rusi, edhe pse vetë nuk ia doli të jetë i pranishëm me kolegët e tij. “Çunave të mi iu uroj më të mirat në Rusi dhe shpresoj që të kthehen si kampionë bote”, shtoi ai.Në fund, Wagner e mbyll me fjalët: “Do të gënjeja në qoftë se do të thosha që nuk jam i zhgënjyer. Botërori do të kishte qenë një gjë fantastike për mua”, përfundoi sulmuesi bavarez, që shpreson të fitojë trofeun e kupës ditën e shtunë ndaj Frankfurtit në Berlin, për të harruar sadopak këtë zhgënjim që pësoi me kombëtaren.