Kryetari i Partisë Demokratike, Lulzim Basha, duket se i ka ngelur ora tek Xhafaj e Tahiri. Ai ende çirret duke thënë se makineria e propagandës qeveritare po kërkon shpërqëndrimin e publikut, e ndërsa dy manipulatorët e PS-së, nuk janë gjë tjetër veçse pengesë drejt BE-së.
Përtej zhvilimeve në Kuvend, ku atë ambient e kanë kthyer në një teatër me kohë të plotë, Basha edhe sot, sikundër çdo ditë tjetër, lëshoi një lum akuzash ndaj dy personave, që tashmë janë kthyer në kryefjalën e ditës.
Jo vetëm Basha, por edhe bashkë me të rinjtë e kësaj force, pavarësisht thirrjeve, ende nuk kanë prishur qetësinë e të akuzuarve, të cilët vijojnë me agjendën e tyre. Sot, nga selia blu, kreu demokrat pohoi se integrimi i Shqipërisë në BE po mbahet peng nga qeveria shqiptare dhe skandalet e saj.
Teksa komentoi deklaratat e nënkryetarit të CDU, se ish-ministri Saimir Tahiri ishte peshk i madh dhe Xhafaj po pengonte integrimin e vendit, Basha theksoi se zgjidhja i takon shqiptarëve, dhe jo kryeministrit Rama.
“Strategjia e deritanishme e Edi Ramës përmes krijimit të një fasade të rremë, që gjërat shkojnë mirë, nuk ka ecur. Fasada ka rënë, qeveria lakuriq para botës. Sot nuk ecin gënjeshtrat, mashtrimet e fajësimet e të tjerëve. Mesazhet e djeshme se Shqipëria nuk ka plotësuar asnjë kusht për hapjen e negociatave, se Tahiri është peshk i madh, se Xhafaj duhet të largohet, janë pasqyra e vërtetë e gjendjes në Shqipëri dhe prova se gënjeshtrat nuk ecin. Numri dy i Merkel, përgjegjës për politikën e jashtme dhe sigurinë në Këshillin e Europës, foli qartë ku deklaroi se duhet të zhbllokohet menjëherë dhe të nisë nga puna Gjykata Kushtetuese dhe e Lartë, dhe të krijohet struktura e përshtatshme anti-korrupsion”
Ana tjetër e medaljes janë edhe protestat e mbajtura nga të rinjtë e FRPD-së dhe LRI-së, të cilët bëjnë shumë zhurmë për asgjë. Ata vijojnë me protestat para Ministrisë së Brendshme, e kjo është në sinkron me atë çfarë trumbeton çdo ditë kreu i PD-së. Por kanë harruar një detaj, që banderolat në formë bilete avioni e droni, nuk janë një gjetje e tyre.
