Ashtu si edhe një vit më parë emri më i lakuar në merkaton e Lazios është ai i portierit të kombëtares shqiptare, Thomas Strakosha. Por drejtuesit e të kaltërve kanë mohuar vazhdimisht zërat dhe kanë insistuar se gardiani kuqezi nuk është në shitje.
Por ashtu si çdo futbollist tjetër, edhe Strakosha e ka një çmim. Nëse do të vinte oferta e duhur atëherë portieri shqiptar do të largohej nga kryeqyteti italian. Duke parë se së fundmi interesi në drejtim të Thomas është shtuar edhe Lazio është duke menduar që të përfitojë sa më shumë.
Gjatë javëve të kaluara është përmendur shpesh interesimi i klubeve angleze për gardianin shqiptar. Sipas “Il Messaggero”, përveç Arsenalit e Tottenham, tani për Strakoshën ka filluar të interesohet konkretisht edhe Ëest Ham. Ndaj në një situatë të tillë Lazio duket gati të hapë ankand mes këtyre skuadrave për të siguruar sa më shumë nga një transferim i mundshëm.
I njëjti burim saktëson se bëhet fjalë për një shifër relativisht të lartë, pasi Claudio Lottito e vlerëson mes 50-55 milionë eurove portierin shqiptar dhe nuk dëshiron ta lërë të largohet për një shumë më të ulët. Pritet që negociatat konkrete të fillojnë në javën e ardhshme, pasi klubet angleze kanë piketuar portierin shqiptar dhe duan të bëjnë investime të rëndësishme për portën e tyre.
