Klubi i Skënderbeut është duke kaluar një moment aspak të mirë në këtë fazë të kampionatit, pasi në tre ndeshjet e fundit ka dalë i mundur. Këtë pasdite u fol në media se trajneri Orges Shehi i ka paraqitur dorëheqjen presidentit Takaj pas rezultateve negative në 4 javët e fundit.
Në deklaratën e klubit korçar, thuhet se stafi dhe lojtarët kanë kontrata afatgjata, që do të respektohen në masën 100%. Klubi e mohon që të pasur një dorëheqje të stafit teknik me në krye trajnerin Orges Shehi, ku për të thuhet se ka besimin maksimal për të vijuar punën dhe projektin e klubit.
POSTIMI
Të dashur tifozë, sportdashës dhe ndjekës të Skënderbeut, duke marrë shkas nga situata e krijuar, aludimet pa fund të mediave dhe mosbesimin e shfaqur karshi ekipit:
Klubi i Futbollit ‘Skënderbeu’ mohon kategorikisht dorëheqjen e stafit teknik me në krye trajner Orges Shehi, i cili ka besimin tonë maksimal për të vijuar punën dhe projektin e klubit.
Fatkeqësisht ekziston një tendencë nga qarqe të caktuara mediatike për të përçarë ekipin dhe tifozët duke përfituar nga ky moment i vështirë.
Ju sigurojmë se asnjë vendim nuk cenon ecurinë e klubit ndryshe nga çfarë shkruhet. Stafi dhe lojtarët kanë kontrata bashkëpunimi me klubin të cilat janë respektuar dhe do të respektohen në masën 100%. Stafi dhe lojtarët kanë qetësinë e duhur për të punuar dhe për tu rikthyer tek rezultatet pozitive si dhe kanë mbajtur përgjegjësi maksimale për rezultatet negative të arritura gjatë 4 javëve të fundit duke premtuar kalimin e kësaj situate të vështirë.
Na vjen keq që me anë të rezultateve negative, kemi krijuar këtë frymë mosbesimi tek tifozët karshi ekipit dhe klubit. Duke kërkuar ndjesë për rezultatet zhgënjyese të javëve të fundit, kërkojmë mirëkuptimin dhe mbështetjen tuaj.
Me qetësinë që prej pothuajse një dekade karakterizon klubin tonë dhe duke mbështetur njëri-tjetrin do e kalojmë edhe këtë moment delikat për të vijuar rrugën tonë drejt sukseseve të tjera.
Me respekt,
KF Skënderbeu
