Gjatë ditës së sotme në qeveri janë dhënë tre dorëheqje. Gjithçka ka filluar me këshilltarët e ministrave teknik. Pas dorëheqjes së dy këshilltarëve të ministrit të Brendshëm teknike Dritan Demiraj, tjetër largim nga ardhur nga radhët e kabinetit të teknikëve.
Këshilltari i Helga Vukajt, ministres teknike të Financave, Asllan Shehra ka dhënë sot dorëheqjen nga ky post. Në vendin e tij është emëruar Eriselda Prishta.
Gjatë ditës së sotme nga ministria e Brendshme e drejtuar nga Dritan Demiraj dhanë dorëheqjen Muhamet Rrumbullaku dhe Aleks Hajdari, dy ish drejtues të policisë që u zgjodhën nga vetë Demiraj si këshilltarë të tij.
Këto janë dorëheqjet e para në nivel këshilltarësh pas marrëveshjes politike të 18-majit mes kryeministrit Edi Rama dhe liderit demokrat Lulzim Basha, ku u emëruan 6 ministra teknikë dhe zëvendëskryeministrja.
Deri tani, asnjë prej ministrave të propozuar nga Partia Demokratike nuk janë larguar nga detyra. Pak ditë më parë u shkarkua drejtori teknik i OSHEE, Haki Mustafa dhe u rikthye në detyrë Adrian Cela. Dorëheqjet vijnë vetëm pak ditë pas mbylljes së procesit zgjedhor.
