Akti që në grumbullimin e kombëtares shqiptare nuk ka asnjë futbollist nga Kategoria Superiore ka sjellë shumë reagime. Një ndër ta ka qenë edhe trajneri karizmatik, Ismet Munishi, i cili në një prononcim për “Shqipëria.ch” ka ironizuar trajnerin Panucci. Ai është shprehur se është i gatshëm që t’i paguaj teknikut italian abonimin e televizorit për të ndjekur ndeshjet e Kategorisë Superiores.
“Do t’ia paguaj unë Panuçit abonimin e televizorit, që ta shohë kampionatin shqiptar edhe në Itali. Ndërsa pjesa tjetër e stafit, nëse ka probleme sa i përket vështrimit të futbollistëve, mund t’i ndihmojë. Ka lojtarë fantastik nga kampionati shqiptar që e meritojnë ftesën, Trashi është njëri prej tyre.
Sa i përket Lilës si kapiten, për mua është ide shumë e mirë. Andi është një luftëtar i madh dhe me përvojë për Shqipërinë, pasi ka përjetuar Beogradin, ndeshjen delikate ndaj Armenisë dhe Europianin e Francës”, u shpreh Munishi.
Kujtojmë që 44-vjeçari shkakton gjithmonë polemika me deklaratat e tij teksa pak kohë më parë sulmoi edhe trajnerët shqiptarë që drejtonin në Kosovë.
