Nja ngjarje e rëndë ka ndodhur në Vlorë, ku një çift është gjetur i djegur brenda banesës së tyre. Sipas të dhënave të para, bëhet fjalë për rrjedhje gazi në apartamentin e tyre, ndërsa mësohet se viktimat janë burrë e grua, Rrok dhe Prena Tata, 65 dhe 49 vjeç.
Çifti banonte në lagjen “Pavarësia” në Vlorë, ndërsa dyshohet se ata kanë gjetur vdekjen që dje, por janë gjetur në banesë pa jetë vetëm sot. Kanë qenë komshinjtë e viktimave ata që kanë dhënë alarmin në polici, pasi të shqetësuar se nuk i kishin parë, i kanë rënë derës, por nuk kanë marrë përgjigje.
Në vend kanë shkuar forca të policisë dhe ambulanca, ndërkohë që po hetohet për zbardhjen e plotë të ngjarjes.
Informacioni paraprak
Më datë 22.12.2017, rreth orës 11:15, Salla Operative Vlorë është njoftuar nga një telefonatë se në një banesë në lagjen ”Pavarsia”, janë gjetur të pajetë dy shtetas.
Shërbimet e Policisë kanë shkuar menjëherë në vendngjarje ku kanë konstatuar se në banesën e shtetasit Rr.T., në lagjen ”Pavarsia”, si pasoje e asfiksimit të rrjedhjes së gazit janë gjetur të pajetë dy bashkëshortët Rr.T. 60 vjeç dhe P.T., 56 vjeç.
Trupat e pajetë janë transportuar në morgun e Spitalit Rajonal Vlorë për tu kryer ekspertiza mjeko-ligjore.
Grupi hetimor po punon për zbardhjen e plotë të rrethanave të ngjarjes.
