Në harkun e rreth tri viteve rezultojnë të zhdukur në rrethana ende misterioze plot 28 persona. Gazetarja e kronikës, Klodiana Lala, tha në emisionin “Opinion” se grupi hetimor ka dyshime se zhdukja e të shumtëve prej tyre janë për larje hesapesh apo hakmarrje për çështje që kanë të bëjnë me veprimtari të paligjshme, kryesisht drogën.
Ajo i mëshoi fort faktit se vendi ynë është kthyer në një vatër të kanabisit dhe drogërave të rënda. Po kështu gazetarja shtoi se të gjitha rastet e zhdukjes, kanë ndodhur në zona që janë larg monitorimit të kamerave.
‘’Nuk mund të flasë për emra. Ka të bëjë me larjen e hesapeve mes bandave kriminale, pasi Shqipëria është kthyer në një vatër të kanabisit dhe drogërave të rënda. Kjo është pista e parë, ndërsa ajo e dyta lidhet me zhdukjen e dëshmitarëve okularë nga ngjarjet kriminale.
Ndodh shumë rrallë që dikush ta stidë vetë vrasjen për të shpëtuar. Të gjitha rastet e zhdukjes, kanë ndodhur në zona që janë larg monitorimit të kamerave. Kalon një periudhë kohe nga momenti që familjarët denoncojnë zhdukjen, deri te momenti kur policia vihet në lëvizje, dhe i deklaron ata persona zyrtarisht të zhdukur”, tha më tej ajo.
