Sonte, Prokuroria Krimeve të Rënda lëshoi urdhër arreste për tre ish-zyrtarë të lartë të policisë së Shtetit. Duke iu referuar “tpz.al”, mes emrave që pritet të arrestohen është edhe ish-drejtori i Policisë së Vlorës, Jael Çela, ish drejtori i Policisë së Shkodrës, Alban Çela si dhe ish drejtori i Postës së Dhërmiut, Sokol Bode. Ky i fundit është fotografuar me Moisi Habilajn. Urdhër arrestet kanë mbërritur në polici dhe pritet ekzekutimi i tyre. Prokuroria kërkon arrestim efektivëve që i cilëson si bashkëpunëtorë të Tahirit në trafikun e drogës.
Po cilët janë tre ish funksionarët e lartë të policisë dhe karriera e tyre dhe lidhjet e tyre me ish-ministrin e Brendshëm, Saimir Tahiri dhe vëllezërit Habilaj
Jael Çela ka punuar më parë si nëndrejtor i Policisë së Qarkut të Durrësit. Me lëvizjet e Tahirit duke qenë njeri i besuar i ministrit, më 1 shtator 2014 Jael Çela emërohet Drejtor i Policisë së Qarkut të Vlorës. Pikërisht në Vlorë operonte dhe grupi kriminal i Moisi Habilajt. Dy muaj para zgjedhjeve vendore të 25 qershorit 2017 në atë që u quajt furtuna në Policinë e Shtetit më 26. 04. 2017, Çela është shkarkuar nga kjo detyrë bashkë më 11 drejtues të tjerë të policisë së shtetit. Shkarkimet u bënë me urdhër të ministrit të Brendshëm, Fatmir Xhafa, pas akuzave të forta të opozitës për lidhjen e policisë më trafikun e drogës dhe mundësisë së ndikimit në zgjedhje.
Alban Çela ka mbajtur poste të larta në policinë e shtetit dhe për të në media është folur dhe për lidhet e afërta me Tahirin. Alban Çela karrierën në sferat e larta të policisë e ka nisur me detyrën e Zv/Drejtorit të Policisë së Qarkut Berat. Alban Çela ka mbajtur më parë postin e kreut të Policisë së Kukësit. Në këtë periudhë pas një incidenti gjatë një proteste të organizuar në dalin disa pamje filmike, ku shefi i Krimeve shfaqet duke u drejtuar armën protestuesve dhe në disa të tjera duke goditur me grushte organizatorin e kësaj proteste, Nderim Lushi.
Pasi ndodhi ngjarja për Alban Çelën u tha se është djali u tezes së Saimit Tahirit. Çelën e sqaroi këtë ngjarje duke mohuar lidhjet familjare me ministrin e Brendshëm, Tahiri. Për shefin e krimeve ai tha se nuk është gjykatës së për këtë duhet të veprojnë organet kompetente.
“Unë nuk jam gjyqtar që të gjykoj çdo veprim, por ka një proces hetimi për këtë rast dhe në fund të procesit të verifikimeve të veprimeve do të merren dhe masat që duhen”
Pasi u harruan pak ngjarjet e Kukësit, Alban Çela emërohet, Drejtori i Drejtorisë Vendore të Policisë Lezhë. Tahiri ka treguar se për të Çela është një efektiv i rëndësishëm dhe për këtë e ka emëruar më 21 korrik 2016 emërohet Drejtor i Drejtorisë Vendore të Policisë, Shkodër. Edhe Alban Çela u shkarkua nga kjo detyrë më 26. 04. 2017 me urdhër të ministrit, Fatmir Xhafa. Me sa duket ministri i ri Xhafa, hoqi nga pozicionet drejtuese të besuarit e Tahirit.
Sokol Bode është qershia mbi tortë e kësaj historie. Ish-shefi i policisë kufitare në Dhërmi është akuzuar publikisht nga Dritan Zagani dhe kreu i departamentit të Sigurisë në PD, Enkelejd Alibeaj, për lidhje kriminale dhe trafik droge me kushërinjtë ministrit Tahiri (Në atë periudhë Tahiri ishte ministër). Denoncimet e Zaganit rezultuan të vërteta për Mojsi Habilajn pas arrestimit ne Itali për trafik ndërkombëtar droge.
Në media u publikua dy foto të Sokol Bodes dhe Moisi Habilajt. Alibeaj duke publikuar fotot tha se ato provojnë edhe njëherë se trafikanti Habilaj ka kapur policinë e Jugut, pikërisht në vendin ku ish efektivi Zagani akuzoi se kalonte trafiku i drogës. Kreu i policisë kufitare në Dhërmi, Sokol Bode, nuk ka prioritet hetimin e trafikut të drogës sepse në fakt është vënë në shërbim të tyre. TIRANA TODAY
