Besnik Hasi tashmë është i lirë të fillojë kontaktet me ekipet që kanë shfaqur interes për shërbimet e tij. Kjo pasi ai ka fituar gjyqin me ish-ekipin që e shkarkoi së fundmi, ekipin grek Olimpiakos.
Ish-kapiteni i Kombëtares shqiptare ka kërkuar të paguhej nga klubi grek sipas kontratës dhe ka arritur të fitojë gjyqin. Duket se palët kanë gjetur një rrugë të ndërmjetme nga e cila do të mbesin të kënaqur të dyja palët dhe për Besnik Hasin do të ketë një dëmshpërblim të mirë, por nuk bëhet e ditur se sa do të jetë shuma. Më me rëndësi për Hasin është ndërprerja e parakohshme të kontratës, pasi ekzistonte një mundësi që ai të qëndronte si i punësuar i klubit deri në mbyllje të afatit të kontratës.
Besnik Hasi është shkarkuat nga detyra e trajnerit të Olimpiakosit edhe pse kishte shumë pak kohë që e mori në drejtim dhe i riktheu ata në Champion League mbas dy vitesh mungesë. Është e vështirë për tu besuar se aftësitë e tij si trajnerë lënë kaq shumë për të dëshiruar, sa të shkarkohet që në javën e gjashtë të kampionatit.
Dihej që në fillim se aventura e trajnerit nga Kosova nuk do të zgjaste shumë në Greqi, prej mentalitetit që ka vendi fqinj për ne, por nuk pritej të ndodhte në një mënyrë kaq të shëmtuar pas katër muajsh.
Ish-skuadra e tij humbi ndeshjen më vendimtare për tifozët, derbin ndaj AEK-ut. Djemtë e Hasit po fitonin 2-0 deri në 60 minutat e para të sfidës, kur, si për çudi, ndodhi përmbysja 2-3. Çfarë fshihet pas kësaj?
E thjeshtë! Mediet greke raportojnë se “puçi” ka ardhur nga portieri Stefanos Kapino. 23-vjeçari praktikisht ka shitur ndeshjen, vetëm që Hasi të dështonte dhe të largohej si humbës.
Trajneri e ka kuptuar këtë dhe pas ndeshjes i ka kërkuar llogari, ashtu si edhe ekipit, por portieri i është kthyer me të njëjtën monedhë, duke sulmuar shokët e tij. Kapino është pezulluar, por Hasi nuk ka më vend tek Olympiacos.
Por kjo “telenovelë” nuk mbaron këtu, pasi në rastin kur e shkarkon klubi një trajner ai është i detyruar të paguaj rrogën e tij deri në përfundim të kontratës, nëse trajneri nuk aktivizohet diku tjetër. Dhe Hasi deri në këto momente mbetet i papunë dhe si detyrim ai duhet të vazhdoj të paguhet nga Olympiacos. Këta të fundit nuk e kanë respektuar kontratën dhe për këtë arsye Hasi ka qenë i detyruar ti drejtohet gjykatës. Ai ka hedhur në gjyq klubin grek për mosrespektim të kontratës dhe se i detyrohet 1.2 milion euro si ç’ishte parashikuar në kontratë.
