Një skenë e shëmtuar ka ndodhur në plazhet e Italisë, ku protagonist ka qenë sulmuesi i Lazios, Ciro Immobile. Italiani gjendej me pushime në plazhin e Francavilla a Mare në Abruzzo në momentin që një i panjohur i është afruar dhe ka filluar ta ofendojë me zë të lartë. Por më pas situata ka degraduar dhe i panjohuri i ka drejtuar një mjet prerës (dyshohet thikë), duke e kërcënuar se do ta vriste.
Sipas mediave italiane, situata mund të agravonte më rëndë, por reagimet e plazhistëve që ndodheshin pranë në atë moment kanë bërë që personi në fjalë të largohej me vrap. Sipas karabinierëve, agresori është identifikuar (njihet si person problematik) pas hetimeve të menjëhershme dhe për të rëndon akuza për kërcënim. Ngjarja ka patur si motiv rivalitetin sportiv.
Ciro Immobile, fatmirësisht nuk ka pësuar asnjë dëm fizik, por tronditja psikologjike ka qenë e madhe, pasi kur nuk i kishte shkuar në mendje që tifoz i një skuadre tjetër do të ofendonte dhe ta kërcënonte edhe me jetë në mes të plazhit.
