Prokurori i Krimeve të Rënda Njazi Seferi, i ka dërguar një ftesë për të dëshmuar babait të viktimës, Aleksandros Kafica. Familja e ka mirëpritur ftesën nga prokuroria. Jani Kafica, babai i viktimës pritet që sot të paraqitet te Prokuroria e Krimeve të Rënda për të dëshmuar në lidhje me atë që di për ngjarjen.
Letra
Familja Kacifas i dërgoi një letër prokurorit Seferi, ku kërkon rikthimin e trupit të djalit. Vrasja e minoritarit ekstremist grek solli tensione dhe deklarata të shumta mes dy vendeve në javën e fundit.
35-vjeçari Kacifa u ekzekutua nga RENEA, pasi refuzoi që të dorëzohej, ndërsa trupi i tij ndodhet në morgun e QSUT për ekspertizë mjeko ligjore, pasi familja kundërshtoi autopsinë në Gjirokastër.
Ndërkohë ditën e djshme konsulli grek në Shqipëri, ka zhvilluar një takim tek prokuroria e Krimeve të Rënda lidhur me hetimet për vrasjen e ekstremistit grek në Bularat të Gjirokastrës.
Mësohet se konsulli grek është takuar me prokurorin e çështjes dhe kreun e Krimeve të Rënda, Donika Prela. Mësohet se konsulli grek është duke u interesuar për vazhdimësinë e hetimeve nga ana e prokurorisë shqiptare.
Ndërkohë që ditën e djeshme, mediat greke kanë raportuar se edhe në Greqi po zhvillohen hetime për këtë çështje, dhe se janë pyetur motra dhe prindërit e tij në prokurori.
Letërporosi në Shqipëri
Pritet që në ditët në vijim prokuroria e Athinës të dërgojë një letërporosi në adrresë të prokurorisë së Krimeve të Rënda, ku do i kërkojë kësaj të fundit të njihet me të gjitha aktet hetimore, pse jo dhe të kërkojë kryerjen e veprimeve hetimore shtesë, për dobi të palës greke.
Grekët kanë kërkuar të asistojnë me ekspertë të mjekësisë ligjore dhe ekspertë balistikë për analizimin e të dhënave të armës, por një kërkesë e tillë është refuzuar nga prokuroria e Krimeve të Rënda, e cila ka pohuar se një gjë e tillë nuk e lejon legjislacioni shqiptar.
Njëherësh prokuroria e Krimeve të Rënda ka refuzuar të legjitimojë avokatin grek të zgjedhur nga familja e të ndjerit, duke pohuar se edhe praninë e tij, nuk e legjitimon legjislacioni Shqiptar.Nisur nga këto kushte, familja ka kontraktuar një studio ligjore shqiptare./shqiptarja.com/
