Një ngjarje e rëndë ka ndodhur në kryeqytet, ku një i ri ka gjetur vdekjen pas një sherri të ndodhur pak para mesnatës.
Përplasja ka ndodhur pranë stadiumit “Dinamo”, ku një i ri me iniciale M.M. është qëlluar disa herë me thikë. 22-vjeçari është dërguar në Spitalin e Traumës, por nuk ka mundur të mbijetojë.
Policia ka arrestuar autorin e vrasjes së 22-vjeçarit me iniciale M.M. Mësohet se ky i fundit fillimisht është përfshirë në një konflikt me një 19-vjeçar, më pas ka ndërhyrë vëllai i tij dhe shokët.
Sherri mes viktimës dhe autorëve ka ndodhur pas një konflikti të çastit për një karikues telefoni.
Mësohet se 22-vjeçari M.M. kishte blerë një telefon nga një agresorëve dhe kërkonte karikuesin. Fillimisht i riu është konfliktuar për motive të dobëta me shtetasin D.B., 19 vjeç.
Ka qenë pikërisht 24-vjeçari Eugen Bitraj sipas policisë që ka qëlluar me thikë 22-vjeçarin.
NJOFTIMI I POLICISË:
Më datë 31.07.2017, rreth orës 23.30 në rrugën ” Gjin Bue Shpata”, shtetasi M.M., 22 vjeç është konfliktuar për motive të dobëta me shtetasin D.B., 19 vjeç.
Në ndihmë të shtetasit D.B, ka ardhur kushëriri i tij shtetasi E. B., së bashku me shtetasit K. A., dhe M.A.
Gjatë konfliktit shtetasi E. B., ka nxjerrë thikën dhe ka goditur shtetasin M. M., i cili për pasojë ka gjetur vdekjen në spital.Si rezultat i reagimit të shpejtë e profesional të shërbimeve të policisë së Drejtorisë Vendore të Policisë Tiranë është bërë e mundur zbardhja në kohë reale e ngjarjes, kapja dhe shoqërimi i gjithë personave të përfshirë në konflikt.
Në përfundim të veprimeve të para hetimore është bërë arrestimi si autor i ngjarjes i shtetasit:
– Eugen Bitraj, 24 vjeç, banues në Tiranë.
Si dhe janë arrestuar si bashkëpunëtore në krim shtetasit:
– Dejvi Bitraj,19 vjeç, banues në Tiranë.
– Kridens Alla,19 vjeç, banues Tiranë .
– Marsel Alla, 23 vjeç, banues Tiranë.
Materialet u referuan në Prokurori, në ngarkim të shtetasve të mësipërm, për veprën penale të “Vrasjes me dashje e kryer në bashkëpunim”.
