Policia e Tiranës finalizon operacionin “Befasia”, duke arrestuar katër persona, të cilët do të shisnin 102 kg kanabis.
Efektivët e policisë njoftojnë se droga ishte fshehur në bagazhin e njërës prej makinave. Uniformat blu ndaluan makinën në aksin rrugor Pezë – Ndroq. Tre prej të arrestuarve janë nga Mallakastra, ndërsa i katërti nga Tepelena
NJOFTIMI I POLICISE
Finalizohet një tjetër operacion antidrogë.
Sekuestrohen në cilësinë e provës materiale 102 kg Cannabis Sattiva.
Arrestohen në flagrancë 4 shtetas.
Më datë 22.04.2017, Specialistët e Seksionit për Narkotikët në bashkëpunim me Seksionin për Operacionet Speciale, në Drejtorinë Vendore të Policisë Tiranë, kanë finalizuar operacionin “Befasia”, në kuadër të cilit janë arrestuar në flagrancë shtetasit:
- Arjan Mustafaj, 43 vjeç, banues në Mallakastër.
- Shpetim Sinaj, 40 vjeç, banues në Mallakastër.
- Erjon Zenelaj, 33 vjeç, banues në Mallakastër.
- Niko Dula, 41 vjeç, banues në Tepelenë.
Këta shtetas në bashkëpunim me njeri-tjetrin, kryenin aktivitetin e jashtëligjshëm të shitjes së lëndëve narkotike të dyshuar të llojit “Cannabis Sattiva”, kryesisht në periferi të Tiranës.
Në bazë të informacioneve është bërë e mundur goditja e këtij grupi dhe më saktësisht në aksin rrugorë Pezë – Ndroq.
Nga kontrolli në automjetet e këtyre shtetasve, në bagazhin e automjetit tip Mitsubishi, janë gjetur dhe sekuestruar në cilësinë e provës materiale 7 thasë të zinj të fshehur poshtë disa thasëve të tjerë me ngjyrë të bardhë.
Në cilësinë e provës materiale janë sekuestruar:
– 102.5 kilogramë lëndë e dyshuar narkotike e llojit cannabis sattiva.
– 2 automjete të markave të ndryshme.
– 8 aparate celularë të markave të ndryshme.
Materialet proceduriale iu kaluan Prokurorisë pranë Gjykatës së Shkallës së Parë Tiranë për veprën penale “Prodhim dhe shitje të lëndëve narkotike e kryer në bashkëpunim”, parashikuar nga Neni 283/2, i Kodit Penal.
