Nuk janë të pakta rastet kur një pakujdesi e vogël ka çuar në incidente të mëdha e fatkeqësisht edhe në vdekje. E tillë është fuqia e një cigareje të ndezur, edhe pse shumë persona mund ta neglizhojnë atë.
Si për të treguar rëndësinë e saj, një qytetar i Tiranës ka treguar një rast mjaft domethënës që ka ndodhur në pallatin e tij.
Duket se një cigare e lëshuar nga ballkoni ka shkaktuar shkrirjen e një karrigeje. Si për të treguar dëmin e shkaktuar, i cili mund të ishte edhe më i madh, banori i këtij pallati ka lënë karrigen jashtë për ta parë të gjithë, ndërsa ka lënë edhe një shënim në të.
“Faleminderit për cigaret e ndezura që hidhni nga ballkoni”, shkruhet shkurt në letër.
E teksa publikon këto foto, një nga banorët ka edhe një mesazh të rëndësishëm. Altin Bamllari shkruan se iu drodh trupi kur pa këtë karrige në korridor, ndërsa shkruan se kjo pakujdesi mund të çojë deri në vdekje për shkak të mungesës së shkallëve emergjente në pallate.
Postimi i plotë i Bamllarit:
“A e keni menduar ndonjëherë si do të shpëtojmë sikur (largqoftë) pallati të na përfshihet nga zjarri? Unë e kam menduar shpesh. Tani që s’kam fëmijët më rrallë, por ja, sot në korridor pashë këtë karrige dhe trupi m’u drodh.
Ne mund të marrim flakë në çdo çast për një mijë e një arsye, por të shkosh në botën tjetër nga komshiu yt idiot, që të hedh cigaren nga ballkoni në ballkon, kjo është një vdekje absurde. Se mos kujtoni se do shpëtojmë? Pallatatet tona janë pa shkallë emergjence. Rrugët për t’u futur zjarrfiksja “mos o Zot”. Do piqemi si kecat dhe do na nxjerrin si kufoma në Opinion. Nuk ka turp më të madh, pastaj, të na komentojnë nga ekrani gjithë byt**irat. Nuk ka.”/ TIRANA TODAY
